Abentura hasi da Barrian! - gaztejarduerak

Aupa, Barriako guraso eta familiak! Idazki honen bidez gure udalekuko lehenengo egunak eman duen guztia kontatu nahi dizuegu, gaurtik hasita gure abentura handia martxan dagoela eta dena bikain doala jakin dezazuen. Goizean goiz iritsi gara Barriako aterpetxe ederrera, emozioz eta motxilak ilusioz beteta. Heldu bezain laster, gure txoko berriak ezagutzen hasi gara, logelak gogoz antolatu ditugu eta lagun berriekin lehenengo konfiantza hartzen joan gara gure gauzak armairuetan txukun jartzen genituen bitartean. Jarraian, talde-giroa sortzeko eta elkarren arteko izenak nahiz zaletasunak ikasteko, ezagutza jolas dinamiko eta dibertigarriak egin ditugu kanpoko berdegune zabaletan. Jolas horiei esker, hasierako urduritasun eta lotsa guztiak berehala desagertu dira eta barre algarak izan dira nagusi goiz osoan zehar, talde handi baten parte garela sentituz.

Gure jantokian bazkari goxo eta indar berritzaile bat jan ondoren, arratsaldeko planik itxarondakoena iritsi da, zuzenean uretara joan garelako. Igerilekuan gure lehenengo bainu freskagarriaz gozatu dugu, saltoka eta lagun artean uretako jolasekin primeran pasatuz eguzkipean. Bainutik irten eta askari goxoa jan ostean, sormenari tartea eman diogu gure txokoan. Talde bakoitza bere nortasuna eta talde-izena pentsatzen hasi da, eta denon artean kartel erraldoi eta koloretsuak diseinatu ditugu, bakoitzaren ideiak eta marrazkiak txertatuz gure gunea apaintzeko. Eguna borobiltzeko, afaldu eta gero, gure lehenengo gaubela misteriotsua iritsi da. Adin tarte honetako handienek estrategia, komunikazioa eta talde-lana eskatzen dituen Kode jolasean aritu dira buru-belarri, erronka handiak gaindituz elkarrekin. Azkenik, logeletara igotzeko ordua heldu dabe. Ohean goxo-goxo sartuta eta argiak itzaltzeko prest geundela, gure monitoreek biharamuneko pertsonaia eta herriarekin lotutako lehen istorio magikoa irakurri digute, eta lasaitasun osoz eta eguneko oroitzapen politekin geratu gara loak hartuta, bihar abentura berriekin jarraitzeko prest.