Zuhatza 12-13 urte Uztailak 8-14 - gaztejarduerak
Azkenik, iritsi da hainbeste itxaron dugun azken ikuskizun handia!
Egun osoan zehar azken prestaketak eta entseguak egin ditugu, gaueko emanaldia bikaina izan zedin. Eta iritsi denean unea, oholtzara ilusioz eta urduritasun puntu batekin igo gara, egun hauetan guztietan prestatutakoa erakusteko.
Dantzak, musika, barreak eta giro aparta izan dira gauaren protagonista. Talde guztiek primeran aritu dira, elkar animatuz eta ikuskizun ahaztezina eskainiz.
Aste zoragarri honi amaiera ezin hobea eman diogu. Abenturaz, lagun berriez eta bizipen ahaztezinez betetako egunak izan dira, eta Zuhatzako oroitzapen politak betiko eramango ditugu gurekin.
Egun on, Zuhatza!
Goizari gogotsu ekiteko, arraun eta piragua jarduerak egin ditugu kanpalekuko gainerako taldeekin batera. Bien bitartean, taldearen beste erdiak taloak prestatzen eta egiten ibili da.
Arratsaldean, frontoian izan gara eskupilotan eta zesta-puntan jolasten. Horrez gain, drama tailer bat egin dugu emozioak lantzeko eta modu dibertigarrian adierazten ikasteko.
Iluntzean, afaldu ondoren, zirkuko musika-bandako konpositore galduen bila aritu gara. Horretarako, haien instrumentuen soinuei jarraitu diegu pista guztiei jarraituz.
Goizean eguzkiaren lehen izpiek esnatu gaituzte, eta badirudi gaur ere eguraldi bikaina izango dugula.
Goizean, zirkuaren giroan murgilduta, aurpegi-margoen tailer dibertigarri batean parte hartu dugu. Ondoren, ur-jarduerekin gozatu dugu: arrauna eta Optimist bela egiten ibili gara urtegian zehar, primeran pasatuz.
Arratsaldean, beroari aurre egiteko, bainu-eremura joan gara. Bertan, itsasoko animaliak erreskatatzeko jolas batean parte hartu dugu, ahalik eta azkarren ertzera iristen lagunduz. Eguna amaitzeko eta eguzkiari agur esateko, Acrosport saio dibertigarri bat egin dugu zelai zabalean, oreka, lankidetza eta barre ugari uztartuz.
Duela hiru egun ezagutu genuen elkar, baina badirudi askoz denbora gehiago daramagula elkarrekin. Pixkanaka talde eder bat osatu dugu, eta dagoeneko familia txiki bat balitz bezala sentitzen gara.
Gaur, piraguan primeran ibili gara, eta gainontzeko jarduerez ere gozatzeko aukera izan dugu. Horrez gain, irlako txoko berriak ezagutzen jarraitu dugu, egunero abentura berriak biziz. Gauean, berriz, bisita berezi bat jaso dugu: Pitonisa misteriotsu bat etorri zaigu etorkizuna iragartzera. Sorpresaz, barrez eta jakin-min handiz beteriko gaua izan da, eta primeran pasatu dugu denok.
Zuhatzako egunak hegan doaz, eta guk gogotsu jarraitzen dugu abentura honetako une bakoitzaz gozatzen!
Gaur eguzkiak lagunduta esnatu gara Zuhatzako irlan, eta eguraldi bikaina aprobetxatuz, uretako ekintzez gozatzeko aukera paregabea izan dugu.
Goiza uretan eman dugu. Windsurfean lehen urratsak egin ditugu, eta akrosportaren bidez oreka, koordinazioa eta talde-lana lantzeko aukera izan dugu. Primeran pasatu dugu, eta irribarreak ez dira falta izan une bakar batean ere.
Arratsaldean ere ekintzek ez dute etenik izan. Ur-jolasekin freskatu gara, herri kiroletan gure indarra eta trebetasuna erakutsi ditugu, eta optimist jardueran belaontziekin nabigatzen jarraitu dugu, esperientzia ahaztezina biziz.
Iluntzean, egunari amaiera ezin hobea emateko, "Eskapisten Irla" eta "Pitonisa Show" gaubelak egin ditugu. Erronkaz, barrez eta giro apartaz beteriko gaua izan da.
Egun zoragarria igaro dugu; orain atseden hartzeko garaia da, biharko abentura berriei indarrez eta ilusioz ekiteko.
Irlara iritsi gara eta sarrera zoragarria egin dugu, txalupan urtegia zeharkatuz. Behin irlara iritsita, Pailazo Zaharrak ongietorria eman digu bere zirku berezira.
Gure taldea ezagutu ondoren, kanpamendua ezagutzera abiatu gara, eta goiza talde-jolas ugari egiten igaro dugu. Arratsaldean, zapi tailerra egin dugu gure taldeari nortasuna emateko, eta, gainera, txapa polit-politak sortu ditugu. Zein nekagarria izan den gaurko eguna, baina aldi berean zein ederra! Orain indarrak berreskuratzeko gogoz gaude, biharko egunari ilusioz eta indarrez heltzeko.